Ik gihorta dat seggen:
dat sih urhettun ænon muotin,
Hiltibraht enti Hadubrant, untar heriun tuem.
sunufatarungo iro saro rihtun,
garutun se iro gudhamun, gurtun sih iro suert ana
helidos ubar ringa, do sie to dero hiltiu ritun.
Hiltibraht gimahalta, Heribrantes sunu - her uuas heroro man,
ferahes frotoro. her fragen gistuont
fohem uuortum, wer sin fater wari
fireo in folche, ...
... "eddo welihhes cnuosles du sis.
ibu du mi enan sages, ik mi de odre uuet,
chind, in chunincriche; chud ist min al irmindeot".
Hadubraht gimahalta, Hiltibrantes sunu:
"dat sagetun mi usere liuti, 
alte ante frote, dea érhina warun,
dat Hiltibrant hætti min fater. ih heittu Hadubrant.
forn her ostar gihueit, floh her Otachres nid,
hina miti Theotrihhe enti sinero degano filu.
her furlaet in lante luttila sitten
prut in bure, barn unwahsan,
arbeo laosa. heret ostar hina.
det sid Detrihhe darba gistuontum
fatereres mines. dat uuas so friuntlaos man.
her was Otachre ummet tirri,
degano dechisto unti Deotrichhe darba gistontun.
her was eo folches at ente. imo was eo feheta ti leop.
chud was her ... chonnem mannum.
ni waniu ih iu lib habbe".
...
"Wettu irmingot", quad (Hiltibraht)